Kabaya: Bageze ku rugero rwa 83,4 % besa imihigo ya 2013/2014

Iyo uhamagaye abatuye umurenge wa Kabaya mu izina ry’ubutore ry”Indongozi barasubiza bati: “gukora ni kare”. Ibi bongeye no kubigaragaza muri uyu mwaka, aho baza ku isonga mu kwesa imihigo kuko imvugo yabo usanga ariyo ngiro.

Kuba umwaka w’ingengo y’imali  wa 2013/2014 ugeze mu gihembwe cya 3 bakaba bageze kuri 83.4% ,biratanga icyizere ko imihigo bihaye izeswa neza, nkuko itsinda ry’akarere rigenzura ishyirwa mubikorwa ry’imihigo ribivuga.

Ibi kugirango babigereho nuko bakorera hamwe nk’ikipi (team work) nkuko Mupenzi Esdras, umunyamabanga nshingwabikorwa w’uyu murenge abivuga. Ibi babishimiwe n’umuyobozi w’Akarere wungirije ushinzwe imali n’iterambere ry’ubukungu Mazimpaka Emmanuel kuri uyu wa 18 gashyantare wari uyoboye itsinda ryaje gusuzuma aho Indongozi za Kabaya zigeze zesa iimihigo.

 

Iri tsinda rigizwe n’abakozi banyuranye, ingabo na police  rizigabanyamo amatsinda 3 azazenguruka imirenge yose asuzuma aho imihigo igeze. Hakazibandwa cyane mu kureba aho ibyari bikosheje mu igenzura riheruka bigeze bikosorwa.

Uretse imihigo isanzwe yerekeye ubukungu, imibereho myiza, imiyoborere myiza n’ubutabera hari izindi ngingo (cross cutting issues) zizibandwaho nk’imihigo y’ingo, imidugudu n’utugari; itangwa ry’ibyangombwa by’ubutaka; gukoresha ifumbire, kuvugurura urutoki, kuvana abantu mumanegeka, gutura mu midugudu, gufata amazi y’imvura no gukoresha rondereza na biogas.

Hazanarebwa kandi uturima tw’igikoni, guteza imbere urubyiruko, guteza imbere abari n’abategarugori, kubakira abatishoboye, imitangire ya serivisi, ibikorwa by’indashyikirwa n’uburyo abana bitabira ishuri.

Umurenge wa Kabaya ukunze kuza ku mwanya wa mbere mu kwesa imihigo ku mirenge 13 igize Akarere ka Ngororero, aho iyi ntebe uyimazeho imyaka 3 yikurikiranya.