Abajyanama b’Akarere ka Musanze bari mu nama yo kwemeza ingengo y’imari ya 2014-2015.

Inama Njyanama y’Akarere ka Musanze, kuri uyu wa Kabiri tariki 24/06/2014  yarateranye yemeza ingengo y’imari ya miliyari 12 na miliyoni 353 izakoreshwa mu bikorwa by’iterambere ry’abaturage no mu mishahara y’abakozi.

Nk’uko byagaragajwe na Raphael Rurangwa, Perezida wa njyanama, ngo iyi ngengo y’imari yiyongereyeho 20% ikazibanda mu guteza imbere imibereho myiza y’abaturage  n’ibikorwaremezo  bizafata 32%  by’ingengo y’imari ni ukuvuga hafi miliyari enye z’amafaranga y’u Rwanda, mu gihe   68%  ahwanye na  miliyari  umunani  n’imisago azakoreshwa mu guhemba abakozi n’imikorere ya buri munsi y’akarere.

Muri iyi ngengo, akarere  kazita  guteza imbere ubuhinzi n’ubworozi  hakorwa  hegitare 100 z’amaterasi  y’indinganire  n’imiryango 210 yorozwe inka   muri gahunda ya Girinka.

Ku bijyanye n’ibikorwaremezo,   hazakorwa imihanda ihuza imirenge itandukanye  yo muri ako karere  mu rwego rwo gukura abaturage mu bwigunge,   koroshya ubuhahirane no kugeza umusaruro ku masoko ku buryo bworohoje.

Akarere  gafanyije n’abafatanyabikorwa batandukanye  kazanubaka  ibigo nderabuzima, amasoko ya kijyambere,    kazatunganya imiyoboro y’amazi  meza  ndetse  abaturage begerezwe n’umuriro w’amashanyarazi.

Perezida wa Njyanama, Raphael Rurangwa yatangaje ko  imisoro  n’amahoro yavuye kuri miliyari  imwe  na miliyoni 200 none  ikaba ari hafi  miliyari 2,  yongeraho ko  bafite gahunda yo kongera imbaraga mu misoro n’amahoro  kugira ngo amafaranga agenewe ibikorwa by’iterambere  ry’abaturage yiyongere.

Izo  miliyari hafi 2  zizakoreshwa mu kugura kizimyamoto, gusana sitade ubworoherane no kubaka ubwiherero ku mashuri ndetse n’isoko rya kijyambere. Umwaka ushize ingengo y’imari yari miliyari 10 zisaga gato.