Gicumbi – Urubyiruko rwiga muri kaminuza ya Byumba rwiyemeje gufatanya na polisi gucunga umutekano

Urubyiruko ruri kuganira na polisi ikorera mu karere ka Gicumbi

Urubyiruko rw’abakorerabushake (Youth Volonteers) biga muri kaminuza nkuru ya IPB (Institut Polytechnique de Byumba) rwiyemeje ubufatanye na Polisi ikorera mu karere ka Gicumbi gucunga umutekano bafatanya gukumira ibyaha bitaraba.

Ubwo bagiranaga ibiganiro na polisi ikorera mu karere ka Gicumbi tariki ya 6/3/2015 bagamije kureba icyakorwa ngo bongere imbaraga mu gukaza umutekano abanyeshuri biga muri kaminuza ya IPB bemeye ko bagiye gukumira ibyaha bitara.

Ngo aba banyeshuri bajya gutekereza iki gikorwa bwari uburyo bwo gukomeza gusigasira umutekano w’igihugu no gufasha inzego z’ubuyobozi gukomeza gusigasira ubusugire bw’igihugu.

Rudasingwa Rechard ni umunyeshuri wiga muri iyi kaminuza yasabye ubuyobozi bw’akarere ka Gicumbi ko muri iki gikorwa biyemeje polisi hamwe n’ubuyobozi bw’akarere bwabemerera bakajya bajya guhura n’abaturage bakabashishikariza uburyo bakwirinda gukora ibyaha ndetse bakabasha no kubikumira bitaraba.

Uhagariye polisi mu karere ka Gicumbi S/S Karangwa Murenge abaha sheke y’ibihumbi 100

Kuruhande rw’ubuyobozi bw’akarere ka Gicumbi nabwo bwishimiye iki gikorwa uru rubyiruko rwagize kuko bizafasha cyane gukumira ibyaha byagaragara muri aka karere biturutse kurugo rw’abaturage baba banywe icyiyobyabwenge cya Kanyanga nk’uko umuyobozi w’akarere ka Gicumbi Mvuyekure Alexandre abitangaza.

Mu gushyigikira ibikorwa by’uru rubyiruko kandi ngo bizajyana no kubongerera ubushobozi bwo kubasha kugera ku ntego biyemeje.

Bimwe muri ibyo bikorwa harimo kubagenera inkunga zitandukanye zirimo aho gukorera inama, ingendo zo kujya kwigisha abo baturage, n’indi mirimo itandukanye bazajya bakora mugikorwa cyo gukumira ibyaha bitaraba.

Uhagariye polisi mu karere ka Gicumbi S/S Karangwa Murenge avuga ko bimwe mubikorwa byo gushyigikira uru rubyiruko byatangiye gushyirwa mu bikorwa kuko bahise barugenera inkunga y’amafaranga ibihumbi 100 byo kurufasha gushyira mu bikorwa ibyo rwiyemeje.

Asanga bizagira ingaruka nziza kuko usanga akenshi ibikorwa urubyiruko rwagizemo uruhare bikunze kugera ku ntego ruba rwiyemeje.