Nyamasheke: Nyuma y’imyaka 18, imibiri y’abatutsi basaga ibihumbi 44 biciwe kuri komini Rwamatamu yashyinguwe mu cyubahiro.

Ku itariki ya 24/06/2012, imibiri 44096 y’abazize jenoside yakorewe abatutsi muri mata 1994 baguye ahahoze ibiro bya komini Rwamatamu muri perefegitura ya Kibuye bashyinguwe mu cyubahiro mu rwibutso rwubatswe aho ibiro bya Komini Rwamatamu byari biri, ubu hakaba hari umurenge wa Gihombo ubarizwa mu karere ka Nyamasheke.

Mu muhango wo guherekeza iyi mbaga y’abatutsi bazize Jenoside, Umuyobozi w’akarere ka Nyamasheke Habyarimana Jean Baptiste yanenze leta kuba mu gihe cya jenoside yarateshutse ku nshingano zayo zo kurengera abaturage kandi bari bayitezeho amakiriro, nk’uko bigaragazwa no kuba barahungiye ku buyobozi ari benshi kandi ahantu henshi hatandukanye, ahubwo ikabica.

Yavuze ko ku biro bya Rwamatamu hakoreshejwe imbaraga nyinshi zihambaye kuko mu gihe cy’icyumweru kimwe gusa imbaga isaga ibihumbi 44 yari imaze kuhasiga ubuzima.

Uhagarariye abacitse ku icumu mu karere ka Nyamasheke, Bagirishya Jean Marie Vianney, yashimiye abaturage bagize uruhare mu gukura iyi mibiri aho yari yaratabwe ndetse no kuyisukura kuko ngo kari akazi katoroshye kandi gasaba ubwitange.

Yakomeje avuga ko uyu wari umunsi ushimishije kuko nyuma y’imyaka 18 ku bufatanye n’akarere babashije gushyingura ababo bazize jenoside yakorewe abatutsi muri mata 1994.

Kwibuka no gushyingura abazize jenoside bikwiye kuba umwanya wo kwibuka leta mbi yaranzwe n’amacakubiri, ukaba n’umwanya wo kwibuka abagize uruhare mu kuyihagarika nk’uko byavuzwe n’umunyamabanga wa leta muri minisiteri y’uburezi ushinzwe Amashuri abanza n’ayisumbuye, akaba n’intumwa ya guverinoma mu karere ka Nyamasheke Harebamungu Mathias.

Yakomeje avuga ko bikwiye kuba n’umwanya wo kurwanya abapfobya jenoside baba abanyarwanda n’abanyamahanga  ndetse n’ababashyigikira. Yasabye abitabiriye uwo muhango kwereka abo bose ko batakiri ba banyarwanda bakoze amahano.

Yaboneyeho kubwira abacitse ku icumu rya jenoside ko badakwiye guheranwa n’agahinda ngo badashimisha abashatse kubamara, anababwira ko leta y’u Rwanda ibitayeho kandi iharanira ko u Rwanda ruzongera rugatemba amata n’ubuki, abanyarwanda bakagabirana.