Rwanda | Nyamasheke: RGB yasabye abayobozi b’inzego z’ibanze kurushaho kwimakaza imiyoborere myiza.

Imiyoborere myiza si umwihariko w’abayobozi, ni ubufatanye bw’inzego zose n’abaturage. Aya ni amagambo yakunze kugarukwaho mu biganiro byahuje Ikigo cy’Igihugu gishinzwe imiyoborere myiza (RGB) n’abayobozi bo mu nzego z’ibanze bo mu karere ka Nyamasheke barimo Abanyamabanga Nshingwabikorwa b’Imirenge, abahagaragriye Inama Njyanama z’Imirenge n’Akarere, abahagarariye imiryango itegamiye kuri Leta, abikorera ku giti cyabo ndetse n’ihuriro ry’abafatanyabikorwa bakorera mu Karere ku itariki ya 24 Nyakanga 2012.

RWEGO Albert waje ahagarariye Transparency Rwanda, yavuze ko abasaba serivisi bose bangana bityo bakaba bagomba kwakirwa kimwe. Abayobozi bose bagomba gukorera mu mucyo, abikorera ndetse n’abaturage nabo bakagira uruhare mu gutuma inzego bakorana na zo zikorera mu mucyo.  Ibi ngo bizatuma babasha gutanga serivisi nziza no gukoresha neza umutungo wa Leta.

Abitabiriye ibiganiro kandi basabwe kurangwa n’imikorere ndetse n’imikoranire myiza nk’uko byavuzwe na Ruburika Antoine, ukuriye ishami ry’imiyobore myiza muri RGB. Yaboneyeho gusaba abari aho kurushaho gukorera hamwe, gutanga amakuru no kumenyakanisha ibakozwe. Ibyo bizatuma amategeko yubahirizwa nk’uko bigaragara mu nkingi 8 z’imiyoborere myiza, uburenganzira bwa muntu bwubahirizwe, abaturage bagire uruhare mu bibakorerwa, bicungire umutekano, ruswa n’akarengane bicike.

Umuyobozi w’Akarere wungirije ushinzwe imari, ubukungu n’iterambere, Bahizi Charles yashimiye RGB ku biganiro by’ingirakamaro bagejejweho kuko bizabafasha kurangiza neza inshingano bafite mu nzego barimo. Ibiganiro bitandukanye byatanzwe bikaba byari bishingiye ku bushakashatsi bwakozwe ku ishyirwa mu bikorwa ry’Imiyoborere myiza mu Rwanda.