Akarere ka Nyabihu kaza ku mwanya wa 10 mu miyoborere myiza

Kugira imiyoborere myiza y’abo bashizwe kuyobora ni inshingano ya buri muyobozi wese mu Rwanda, haba mu turere  uko ari 30 ndetse no muzindi nzego.

Iyi ni imwe mu mpamvu hakorwa ibigereranyo bitandukanye  ku bijyanye n’imiyoborere myiza ku rwego rw’uturere, bikaba bisaba buri muyobozi w’akarere n’abamugaragiye uhereye mu nzego z’ibanze kunoza imiyoborere myiza hitabwa cyane cyane ku cyateza imbere abaturage ayoboye n’igihugu muri rusange. Ni muri urwo rwego, urwego rw’umuvunyi rwateguye gahunda y’amarushanwa ku miyoborere myiza yitabirwa n’uturere, akaba akoreshwa muri gahunda y’ibikorwa byahariwe icyumweru cyo kurwanya ruswa kiba mu kwezi kw’Ukuboza buri mwaka .Aya marushanwa akaba akozwe ku nshuro ya 4.

Ayo marushanwa yateguwe mu byiciro bibiri : icyiciro cya mbere buri karere kuzuza imbonerahamwe y’ibibazo bashyikirijwe ku gihe, naho icyiciro cya kabiri Urwego rw’Umuvunyi rukagenzura niba ibyujujwe n’uturere bifite ibipimo bifatika. Akarere kasabwaga kuzuza imbonerahamwe kerekana ibyagezweho n’ibibigaragaza bishingiye ku ngingo enye ngenderwaho arizo imiyoborere, ubugenzuzi, imitangire y’amasoko n’imenyekanishamutungo, hakiyongeraho n’udushya Akarere kagezeho mu rwego rwo kurwanya ruswa. Ibisubizo byanditse bigashyikirizwa Urwego rw’Umuvunyi ku gihe bigahabwa amanita kuri 30, naho igenzura rigahabwa amanota 70. Muri aya manota 70,  amanota 20 yaharirwaga udushya mu kurwanya ruswa. Dore uko uturere 30 tw’ u Rwanda twitwaye dute mu mwaka wa 2010-2011.

1.  GISAGARA  n’amanota 87
2.  NYAMASHEKE n’amanota 86
3.  KAMONYI n’amanota 85
4.  RULINDO n’amanota 83.5
5. GATSIBO n’amanota 83
6.  NYARUGENGE n’amanota 82.5
7.  KICUKIRO n’amanota 82
8.  NGORORERO n’amanota 81.5
9.  BURERA n’amanota 81
10.  NYABIHU n’amanota 80
11.  HUYE n’amanota 78
12.  NYAMAGABE n’amanota 77
13.  NYARUGURU n’amanota 76
14.  RUTSIRO n’amanota 76
15.  GICUMBI n’amanota 76
16.  RUBAVU n’amanota 75
17.  KAYONZA n’amanota 74
18.  RUHANGO n’amanota 73
19.  MUHANGA n’amanota 72
20.  NGOMA n’amanota 70
21.  GAKENKE n’amanota 66
22.  NYANZA n’amanota 60
23.  RUSIZI n’amanota 54
24.  BUGESERA n’amanota 50.5
25. GASABO n’amanota 50
26.  MUSANZE n’amanota 49.5
27.  KARONGI n’amanota 40
28.  KIREHE n’amanota 40
29.  NYAGATARE n’amanota 40
30. RWAMAGANA n’amanota 0

hagaragayemo uturere twagiye dusubira inyuma utundi tukaza imbere ku myanya  twahozeho, Akarere ka Nyabihu kari kabaye aka mbere umwaka ushizemu kurwanya ruswa, ubu kaje ku mwanya wa 10. Mu mwaka ushize wa 2009-2010 akarere ka Kamonyi kari ku mwanya wa 16 none ubu kari ku mwanya wa 3 byerekana ko kateye imbere . Akarere ka Gatsibo, mu mwaka ushize kari ku mwanya wa 26, ubu kari ku mwanya wa 5 ; Akarere ka Nyarugenge kari ku mwanya wa 27 umwaka ushize, ubu kari ku mwanya wa 6 ;Akarere ka Rutsiro mu mwaka ushize kari ku mwanya wa 30, ubu kari ku mwanya wa 14 ;Akarere ka Nyamagabe mu mwaka ushize kari ku mwanya wa 25, ubu kari ku mwanya wa 12 . Gusa uturere twaje imbere tukaba ngo twararanzwe n’udushya mu kurushaho guhashya ruswa aho iva ikagera.