Akarere ka Huye kiyemeje gukuba kabiri imisoro kinjiza

Akarere ka Huye karatangaza ko  buzakuba kabiri imisoro kinjiza nk’uko biri mu mihigo y’ako y’uyu mwaka. Ibi ngo bizagerwaho hasoreshwa ibikorwa bigomba gusora bitasoraga.

Umuyobozi w’akarere wungirije ushinzwe amajyambere n’ubukungu, Cyprien Mutwarasibo, avuga ko uyu mwaka Huye yahize kwinjiza imisoro ingana na miliyoni 800 mu gihe umwaka ushize aka karere kari karinjije miliyoni 400 z’imisoro.

Mutwarasibo avuga ko uyu mwaka imisoro iri kugenda yiyongera kurusha mu bihe bishize. Avuga kandi  ko iyi misoro igomba kwiyongera  itazava mu kwongera amafaranga abasoreshwa batanga ahubwo hazasoreshwa ibikorwa bitasoraga kandi mu mategeko byagombye gusora.

Avuga ko bimwe mu bitasoreshwaga neza harimo imisoro ku nyungu z’ubukode ndetse n’imisoro y’ibibanza.

Mutwarasibo agira ati: “hari ibikorwa byinshi muri aka karere bidasora kandi byagakwiye gusora,  tuzanoza urutonde rw’abasoreshwa cyane cyane mu murenge wa Ngoma.”

Umurenge wa Ngoma wibanzweho kubera ko ariwo uherereyemo umujyi wa Huye, hakaba hari ibikorwa byinshi bigomba gutanga imisoro. Uretse umurenge wa Ngoma, hari indi mirenge imara amezi ane itarasoresha kandi igomba gutangwa buri kwezi

Abasoresha batabashije kwinjiza imisoro nk’uko bisabwa n’akarere bavuga ko byatewe n’uko hari abacuruzi baterekana agaciro k’ibyo bacuruza ngo bamenye ayo bagomba gusoreshwa.

Hari kandi ibikorwa byasoreshwaga bitagikorwa. Aha batanze urugero rw’imicanga n’amabuye byacukurwaga mu mirenge imwe n’imwe ariko kugeza magingo aya bikaba bitakihacukurwa.

Aha ubuyobozi bw’akarere bukaba bwo bugaragaza ko hari n’aho ibyo bigicukurwa ariko ntibisoreshwe.

Biragoye kwemeza ko uyu muhigo akarere ka Huye kihaye kazawugeraho kuko umwaka ushize kari kahize kwinjiza miliyoni 600 ariko kakinjiza miliyoni 400 gusa.

Muri karere ka Huye hatangwa umusoro umusoro ku nyungu z’ubukode, umusoro ku mutungo utimukanwa, amahoro y’akarere atangwa buri kwezi n’abacuruza butike, utubari n’ibindi.

N’ubwo u Rwanda rukitabaza abaterankunga ndetse n’inguzanyo mu ngingo y’imari ya buri mwaka, Leta ifite gahunda yo kwishakamo ingingo y’imari ubwayo idateze amaboko ku baterankunga. Imisoro niyo ikoreshwa mu bikorwa remezo birimo kubaka amashuri, imihanda, amavuriro ndetse n’ibindi bikorwa by’amajyambere rusange.

Gerard GITOLI Mbabazi