Ubukanguramba bwimbitse ni bwo bwatuma abantu benshi bitabira gahunda z’amatora

Kuri uyu wa kane tariki 29/3/2012, mu karere ka Kamonyi hahuguwe abajyanama b’ubuzima kugira ngo nabo bamenye uruhare rwabo mu kwimakaza Demokarasi n’Imiyoborere myiza kuko mu kazi kabo ka buri munsi bahura n’abaturage benshi.

Mu gihe  abanyarwanda bitegura amatora y’abadepite azaba muri 2013, Komisiyo y’igihugu y’amatora (NEC) ikomeje guhugura inzego zitandukanye zifite inshingano ku baturage , ku miyoborere myiza na demokarasi, kugira ngo bafashe abakorerabushake b’amatora gukangurira abaturage kwitabira gahunda z’amatora.

Musoni Maurice, umuhuzabikorwa wa Komisiyo y’igihugu y’amatora mu karere ka Kamonyi, avuga ko bahisemo guhugura inzego zose zihura n’abaturage cyane kugira ngo bajye bahwitura abaturage muri gahunda z’amatora.  “Abajyanama begera abaturage babagira inama , ni byiza ko babaganiriza no kuri gahunda z’amatora” uko niko abivuga.

Ku ruhande rw’abajyanama b’ubuzima ngo ubundi bajyaga baharira ubukangurambaga abakorerabushake ba Komisiyo y’amatora gusa. Ariko kubw’amahugurwa bamaze guhabwa bakaba bagiye gufatanya n’izindi nzego gusobanurira abaturage ibyiza by’amatora ashingiye kuri Demokarasi n’imiyoborere myiza.

Havugimana Narcisse wo mu murenge wa Kayumbu ati “ntibyajyaga bikunda kubaho ko abajyanama b’ubuzima bagira uruhare mu gukangurira abaturage amatora”. Ubu ngo bagiye kubyinjiza muri gahunda zabo bakangurire abaturage ibyiza byo kwitabira amatora no gutora ingirakamaro nta marangamutima.

Arashima ko igikorwa cy’ubukangurambaga ku matora cyakorwa n’abantu benshi wenda bakajya bagera no mu ngo z’abaturage.

Naho Nyirahabimana Immaculee w’I Musambira abona byaba byiza habayeho ubukangurambaga bwihariye ku bantu bigize batajya bitabira gahunda za leta. Abo ngo bakabasanga mu ngo zabo kuko akenshi baba batitabiriye inama zavugiwemo ibijyanye n’amatora.

Umuhuzabikorwa wa Komisiyo y’igihugu y’amatora akomeza avuga ko abaturage bagomba kumenya ko gutora atari ukurangiza umuhango ahubwo bagomba kumenya guhitamo ingirakamaro kandi bagakurikirana imikorere yabo.

Komisiyo y’amatora irateganya guhugura abantu bose bafite inshingano ku baturage kugirango babafashe guhindura imyumvire y’abaturage ku bijyanye n’amatora. Abajyanama b’ubuzima bakaba bahuguwe nyuma y’abagize Inama y’Igihugu y’urubyiruko, Inama y’igihugu y’ababana n’ubumuga, Inama y’Igihugu y’Abagore, Intore n’ihuriro ry’abanyeshuri bo mu mashuri yisumbuye.