Gisagara: Baganirijwe ku mibereho y’abanyarwanda mbere na nyuma ya jenoside

Kubera igihe cy’iminsi 100 abanyarwanda barimo cyo kwibuka Jenoside yakorewe abatutsi muri mata 1994 tariki ya14 mata Depite Spéciose MUKANDUTIYE yagiye mu Murenge wa Kigembe mu Kagari ka Mpinga na Gatongati ho mu Karere ka Gisagara kwifatanya  n’abaturage  baho  kwibuka abazize jenoside yakorewe Abatutsi mu Rwanda  muri Mata 1994 no kubaganirira.    

Ikiganiro cyabereye  ku ishuri  ry’uburezi  bw’ibanze bw’imyaka 12  rya Janja ,  aharebana  n’icyuzi cya CYAMWAKIZI cyaroshywemo abatutsi benshi  baturutse mu bice bitandukanye by’u Rwanda bahageze bashakisha  inzira yabageza  mu Gihugu cy’Uburundi.

Atangiza ikiganiro, Umunyamabanga Nshingwabikorwa w’Umurenge wa  Kigembe Bwana RENZAHO J.Damascène yabanje  kwihanganisha  abari bitabiriye ikiganiro kubera  igihe turimo kibabaza imitima ya benshi.   Yagarutse ku mateka  yo muri aka gace, aho yavuze ko kari karahejwe inyuma n’amateka  nta muyobozi wahageraga, bishora kuba ari bimwe mu byatumye jenoside ihagira ubukana  ariko  muri iyi minsi  basigaye basurwa  n’Intumwa ya Rubanda ngo bizagira ingaruka nziza kuri aba baturage.

Madamu Depite  Spéciose  MUKANDUTIYE  yatanze ikiganiro ku Imibereho y’abanyarwanda mbere na nyuma ya Jenooside yakorewe abatutsi muri Mata 1994.  Yavuze ko abanyarwanda  bo hambere bagiraga ubumwe, bakarangwa no gufashanya ariko ubu ngo abanyarwanda barahindutse ikintu cyose basigaye bakibonamo inyungu mbere  yo  gutekereza umuco  ubahuza kuva kera kose.

Yasabye abagabo bo muri  uyu Murenge wa Kigembe kwitabira gufasha impfubyi n’abapfakazi basizwe iheru heru na jenoside yakorewe Abatutsi kandi  bakabafasha nta zindi ndonke babatezeho ahubwo ari umutima utabara, impuhwe n’urukundo.

Yihanangirije abagore bafite abagabo  usanga batekereza ko abapfakazi babatwarira abagabo kuko  babonye hari icyo babafashije, bakamenya ko ataribo babyiteye  kandi buri wese ashobora gupfakara  agakenera uwamufasha  mu kazi gakomeye adashoboye nko gusakara inzu yavuye,gutera idirishya , urugi  n’ibindi. Yaboneyeho n’umwanya wo kunenga abagabo batanga iyo serivisi  bagamije gusambanya impfubyi  n’abapfakazi ba jenoside.

Asoza yabwiye abadamu ko ari abajyanama  b’Umuryango Nyarwanda, bityo bakwiye kuba Abajyanama beza bakagabura ubumwe bagasasa urukundo.

“Nimwe bajyanama b’umuryango kandi nimwe urugo rukesha gususuruka, bityo rero ni mube abo kwigisha urukundo mu banyarwanda” Ibi byavuzwe na Depite Spéciose

Baganira aba baturage bahurizaga ku kibazo cy’ubudehe bwabagejejweho ariko bakaba barabuze irengero ryabwo kuko ntacyo bubafasha kandi  baracitse ku icumu rya jenoside,  kandi ari n’abakene.

Mu Murenge wa Kigembe, mu Kagari ka Mpinga ubu habonetse imibiri 24 y’abazize jenoside yakorewe abatutsi muri Mata 1994 bari batarashyingurwa mu cyubahiro kuko amakuru yo kumenya ko aho hantu bahari yari ataratangwa ,akaba yarabonetse mu ikusanyamakuru mu gihe cy’Inkiko Gacaca.  Iyi  mibiri ikabaizashyingurwa mu rwibutso rwa jenoside rwubatse i Kansi mu Kagari k’Akaboti .