Umunyamuryango wa FPR-Inkotanyi ntagomba kuba umunyamushiha-Dr.Harebamungu

Umunyamabanga wa leta ushinzwe amashuri abanza n’ayisumbuye muri Minisiteri y’uburezi, atangaza ko umunyamuryango wa FPR-Inkotanyi akwiye kurangwa n’ibikorwa byiza byivugira bikurura n’abandi nabo bakaba abanyamuryango.

Tariki ya 08/12/2012 mu karere ka Burera ubwo hizihizwaga isabukuru y’imyaka 25 umuryango FPR-Inkotanyi umaze uvutse, Dr Harebamungu Mathias yasabye abanyamuryango ba FPR -Inkotanyi bo muri ako karere kutarangwa n’umushiha.

Yagize ati “…umunyamuryango ntagomba kuba umunyamushiha. Umunyamuryango agomba kugira ikiyengera kireshya kandi kikazana na wawundi utari umunyamuryango….”

Akomeza agira ati “…wa wundi ugomba kwegera ntuzamushwaratute ariko uzamushimashime mu bikorwa byivugira, mu bitekerezo. Uzamukirigite azamwenyura, uzamwagaze azakugana.”

Yongera ho avuga ko umunyamuryango wa FPR –Inkotanyi atagomba kubona mugenzi we utari umunyamuryango “nk’icyasha”. Ahubwo akwiye kumwegera n’iyo yaba afite “icyasha cyangwa umwanda akamwoza”.

Dr Harebamungu avuga ko kuri ubu nta munyarwanda wagoswe n’ubujiji ukibaho muri FPR-Inkotanyi kuko abana bageze mu gihe cyo kwiga bigira ubuntu mu burezi bw’ibanze bw’imyaka 12  nk’uko abisobanura.

Akomeza avuga ko kandi muri FPR-Inkotanyi nta munyarwanda ukicwa n’urw’ikirago kubera ko yabagejeje ho gahunda y’ubwisungane mukwivuza (Mituelle de Santé) aho bivuza ku mafaranga make.

Yongera ho ko mu byiza byinshi FPR-Inkotanyi imaze kugeza kubanyarwanda harimo n’umutekano. Aho buri wese aryama agasinzira, agatembera nta nkomyi. Uwo mutekano wose ni abanyamuryango ba FPR-Inkotanyi bawugize mo uruhare. Ibyo byiza byose abanyamuryango bagomba kubisigasira Dr Harebamungu nk’uko abivuga.

Mu kwizihiza isabukuru y’imyaka 25 umuryango FPR-Inkotanyi umaze uvutse, mu karere ka Burera, hagaragajwe ko muri ako karere abanyamuryango ba FPR-Inkotanyi bamaze kugera kuri 97%.

Ngo kuba bangana gutyo bifite ishingiro kuko mu ntambara yo kubohoza u Rwanda yo mu 1990 abanyaburera bakiriye neza ingabo zahoze ari iza FPR-Inkotanyi maze bituma kubohora igihugu byihuta.