Abayobozi b’uturere bitabiriye umwiherero wabereye I Rubavu

Kuva taliki ya 20/12/2013 abayobozi b’uturere tugize u Rwanda bari mu mwiherero w’iminsi ibiri wateguwe n’ishyirahamwe ry’uturere n’umujyi wa Kigali RALGA, aho baganira kuri gahunda zo kwihutisha imiyoborere myiza no guteza imbere abatuye uturere bayobora.

Minisitiri James Musoni nawe witabiriye uyu mwiherero aganira n’abayobozi b’uturere, yabagaragarije uburyo bwakoreshwa mu guteza imbere uturere bayobora bihutisha iterambere kubadutuye hagendewe ku mahirwe atubonekamo nko guteza imbere ubuhinzi n’ubworozi.

Minisitiri w’ubuhinzi Dr. Agnes Kalibata hamwe na Minisitiri w’ingabo Gen James Kabarebe bakaba nabo bari mu karere ka Rubavu baganira n’abari muri uyu mwiherero no kureba aho aka karere kageze mu kwihutisha iterambere.

Umwiherero washojwe tariki 21/12/2013, hanyuma abaminisitiri basura ibikorwa by’iterambere ry’akarere ka Rubavu birimo gutaha ibagiro rya kijyambere rimaze kuzura ritwaye 2,060,000,000 RwF rikazateza imbere ubucuruzi bw’inyama bwambukiranya umupaka

Akarere ka Rubavu uretse kuba benshi mu bagatuye bakora ibikorwa by’ubucuruzi bwambukiranya umupaka ni akarere gafite ubutaka butanga umusaruro hakaba hacyenewe kongera imbaraga mu musaruro uboneka kuri hegitare.

Minisitiri James Musoni hamwe na Minsiitiri w’ingabo biteganyijwe ko banasura imishinga y’iterambere muri aka karere , uru ruzinduko rukaba ruri mu rwego rwo guteza imbere imibereho myiza cyane ko Minisitiri w’ingabo Gen Kabarebe ariwe mujyanama w’akarere ka Rubavu.