Gatsibo: Bakanguriwe kunoza imikorere n’imikoranire
Rugamba Egide umuyobozi mukuru muri Minisiteri y’ubutegetsi bw’igihugu ushinzwe igenamigambi
Abayobozi mu nzego zose zikorera mu Karere ka Gatsibo barakangurirwa kurushaho kugaragaza uruhare rwabo mu ishyirwa mu bikorwa ry’imihigo bahize, ahagaragaye imbogamizi na ho bakihutira kuhagaragaza no kubiganiraho bityo ngo bibe byarushaho kugenda neza.
Ibi babisabwe n’umuyobozi w’Akarere ka Gatsibo Ruboneza Ambroise ubwo bahuriraga ku kicaro cy’akarere muri gahunda yo gusuzuma ibimaze kugerwaho muri aya mezi atandatu.
Muri iyi gahunda yo gusuzumira hamwe ibimaze kugerwaho mu rwego rwo kwesa imihigo mu karere ka Gatsibo muri aya mezi atandatu ashize,hashimiwe muri rusange imwe mu mirenge n’utugari tuza ku isonga mu ishyirwa mu bikorwa ry’ibyo bahize.
Rugamba Egide umuyobozi mukuru muri Minisiteri y’ubutegetsi bw’igihugu ushinzwe igenamigambi aganira na kigalitoday yadutangarije ko nk’intumwa za Ministeri basanze Akarere ka Gatsibo muri rusange gahagaze neza muri iyi mihigo y’amezi 6.
Yagize ati”Akarere ka Gatsibo kari mu turere turi ku kigero gishimishije mu gushyira imihigo mu bahize bikorwa ugereranyije n’utundi turere”.
Rugamba akomeza avuga ko ahagaragaye integenke mu guhiga imihigo yahizwe byatewe n’abafatanya bikorwa bagiye batinza infashanyo bari beneye gutanga, ubu ngo Minisiteri ikaba igiye kugirana ibiganiro nabo bafatanyabikorwa, hakarebwa aho byapfiriye bigakosorwa.
Karambizi Anaclet ni umuyobozi w’Akarere ushinzwe ubutegetsi n’imari avuga ko ingengo y’imari yari iteganyijwe muri aya maze 6 yakoreshejwe neza uko byari byateganyijwe ndetse n’imishinga yari iteganyijwe gukorwa ikaba imyinshiyararangiye.
Karambizi Anaclet umuyobozi w’Akarere ushinzwe ubutegetsi n’imari
Indi ngingo yaganiriweho ni ijyanye n’umutekano, mu ijambo rye umuyobozi w’Ingabo mu karere ka Gatsibo Major Mugisha,yongeye kwibutsa ko buri muturage ari ijisho rya mugenzi we,abasaba kwirinda ibiyobyabwenge bimaze iminsi bigaragara muri aka Karere.
